是咁的，話說今朝食早餐聽到隔離枱個大叔教仔。一開始個三十歲出頭既呀仔係咁同呀媽講：「個呀姐打錯飛呀，攪到魚柳變左雞扒，都唔係第一次喇！」個呀媽一路聽一路點頭，成個點頭公仔咁，但係仲可以一路食野嗰下勁。坐係佢地對面係個貌似張三豐嘅白鬍子大叔，好明顯係老豆樣。佢聽左幾分鐘之後終於忍唔住...
「好喇！係你錯！唔係個呀姐錯！」
大聲到離晒地，呀仔即刻冇聲出。
「係你錯，因為係你自己冇check單。我第一日出嚟做野，人地就教我，自己永遠係最後把關嗰個，你自己冇睇清楚，只可以怪自己！唔好怪人！」
聽完之後有冇想送呢句說話俾邊個？我即刻諗起公司以H字膊聞名嘅同事（記住，係A字膊進化為H字嘅變種生物。研究顯示，所有粒子只會係佢地膊頭上面停留0.000000000001秒左右，人類眼睛係唔會睇得到嘅）相信梗有一兩個係大家左近。
係現今辦公室，當有鑊出現被問責嘅時候，好多人好自然會將責任推係人地度。有幾多人會好似呢位大叔咁，識得反思一下自己其實都有問題。
希望大家從呢位大叔嘅說話上面學到野，同埋將呢個故事share出去，俾身邊H字膊生物睇到，醫返佢地個移晒位嘅膊頭。
photo source: pixabay
嚴禁非法轉載
Copyright © HR小薯蓉. All rights reserved.
Search